monumenta.ch > Hrabanus Maurus > sectio 14

Wortauswahl für das Suchen

Melden Sie einen Fehler in dieser Sectio
Hrabanus Maurus, Martyrologium, 2, 14
XVI KAL. Mart. Romae nativitas sancti Valentini presbyteri, qui post multa sanitatum et doctrinae insignia fustibus caesus, et sic decollatus est, sub Claudio Caesare. Eodem die nativitas sancti Valentini Interamnensis episcopi, qui tentus a paganis, ac virgis caesus, et post diuturnam caedem custodiae mancipatus cum superari non posset, medio noctis silentio eiectus de carcere, decollatus est, iussu furiosi Placidi praefecti Urbis. Tunc Proculus, Efybus et Apollonius, discipuli eius, transferentes corpus ad suam ecclesiam Interamnae urbis, noctu sepelierunt: ubi cum quotidianis vigiliis incubarent, tenti a gentilibus custodiae sunt traditi consulari Leontio, quos ille iussit noctis medio suis tribunalibus praesentari, et cum a fide revocari nec blandimentis nec minis possent, iussit capite caedi, qui non longe sunt a capite sancti Valentini sepulti.